Babi dan Nangka

Suatu hari pace Lalo ini dari kampung mau menuju di kota untuk jual barang yang ada dalam dia pu karong.  Pas begini ada angkot lewat, lalo ini kasih berhenti angkot. Pace kondektur tanya "bapa, mau ke kota kah?" pace Lalo jawab "io anak, sa mau ke kota mau jual dalam karung ini". Trus kondektur tanya lagi  “itu barang apa pu besar skali sampe ko mau jual?" pace Lalo bilang “anak, ini sa bawa nangka!” Akhirnya mereka berangkat ke kota.

Pas ditengah perjalanan tiba-tiba penumpang-penumpang tutup hidung. Bapa supir suruh pace kondektur ini periksa barang apa yang bikin bau. Kondektur keliling-keliling tiba-tiba dia cium barang tra enak dari karungnya pace Lalo. Pace kondektur angkat bicara, “pace ko pu karung ini bau khas skali. Sebenarnya ko tra bawa nangka toh. Ko bawa babi toh?” Pace Lalo yang daritadi ketawa-  ketawa langsung jawab “siooo anak eh. Ko pu hidung sirbeh skali. Io memang sa ada bawa babi tapi dia pu nama itu Nangka karena dia pu poroh su besar kayak nangka.”  

 Haahahahahahaaaaaaaa!!!!!!!